«Ой дария» дебат клубының ұйымдастыруымен өткізілген «Жемқорлықсыз мемлекет құрудың негізі – қатаң жаза» тақырыбындағы пікірсайыс

«Ой дария» дебат клубының ұйымдастыруымен өткізілген «Жемқорлықсыз мемлекет құрудың негізі – қатаң жаза» тақырыбындағы пікірсайыс – жас ұрпақтың бойында адалдық, әділдік, парасаттылық пен жауапкершілік құндылықтарын қалыптастыруға бағытталған маңызды тәрбиелік іс-шара болып табылады. Іс-шараның басты мақсаты – жастардың құқықтық сауаттылығын арттыру, сыбайлас жемқорлыққа қарсы саналы көзқарас қалыптастыру және азаматтық белсенділікті нығайту.Пікір сайыс барысында қатысушылар екі тарапқа бөлініп, өз көзқарастарын нақты дәлелдер мен өмірлік мысалдар арқылы қорғады. Бір тарап қатаң жазаның жемқорлыққа қарсы тиімді шара екенін алға тартса, екінші тарап қоғамдағы адалдық мәдениеті мен тәрбие, алдын алу жұмыстарының рөлін атап өтті. Қатысушылар өз аргументтерін дәлелдеу барысында сыни ойлау, шешендік шеберлік және логикалық тұрғыда пікір айту дағдыларын көрсетті.Іс-шараға арнайы қонақтар шақырылды. Атап айтқанда, Жамбыл облыстық «Алғырлар» интеллектуалды пікірсайыс клубы төрағасы Бақберді Асланбек, Сүйеркулов Қанат және Рыспай Арай қатысты. Рыспай Арай – мектеп-интернат түлегі, бүгінгі таңда білімгер болып отыр. Қонақтар жастармен еркін форматта кездесу өткізіп, адалдық, әділдік, заңға құрмет және жауапкершілік сияқты құндылықтарды насихаттады. Сонымен қатар, олар пікірсайыс мәдениеті, азаматтық белсенділік, қоғамдағы өзекті мәселелерді талқылау жолдары туралы тағылымды әңгіме жүргізді.Қонақтар өз сөздерінде жастарды өз ойларын ашық айтуға, дәлелді пікір қалыптастыруға, сыбайлас жемқорлыққа төзбеушілік ұстанымын қалыптастыруға шақырды. Олардың тәжірибелері мен кеңестері қатысушылардың тұлғалық дамуына, қоғамдық мәселелерге жауапкершілікпен қарауына және құқықтық мәдениетінің артуына ықпал етті.Қорытындылай келе, «Ой дария» дебат клубының ұйымдастыруымен өткен бұл пікірсайыс жас ұрпақтың азаматтық белсенділігін арттыруға, рухани-адамгершілік құндылықтарды нығайтуға және сыбайлас жемқорлықсыз қоғам құру идеясын қолдауға зор үлес қосты. Іс-шара қатысушыларға тек қана құқықтық және моральдық білім беріп қана қоймай, олардың ой-өрісін кеңейтіп, қоғамдағы әділдік пен адалдыққа негізделген шешім қабылдау қабілетін қалыптастырды.

Жауапты: М.Е. Жайдарова тарих пәнінің мұғалімі